Петар Печков

Објавено: среда, 02 февруари 2011 905 452

Висок одѕив за вакцинација на велешките деца од школска и претшколска возраст бележи  надлежниот Диспанзер при ЈЗУ Медицински центар. Дури 99 отсто на децата од школска возраст од 6 до 18 години се вакцинирани со потребните вакцини за сипаници, заушки, дифетерија, тетанус, детска парализа и туберколоза, додека 96 отсто од децата до 6 годишна возраст добиле вакцина за хепатит Б, детска парализа,  дифтерија и тетанус. Овие податоци ги ставаат во врвот децата од велешко, како лидер  во земјава по вакцинација и здравствена заштита.

За овие  високи проценти на вакцинирани деца стои сериозна, долга, успешна и ангажирана работа. Имаме одлична соработка со училиштата. Ако детето не дојде на вакцинирање кај нас или не е на училиште, знаеме да го побараме дома и да го вакцинираме. Значајно е што за овој успех, немаме напишано ниту една прекршочна пријава против родител дека не го вакцинирал детето, како што вели Законот.  Напротив одиме и по селата Градско, Чашка, Бузалково, Горно Јаболчиште за што повеќе деца да бидат опфатени во интерес на нивното здравје – вели д-р Пандели Божиков од Диспанзерот за вакцинирање при ЈЗУ Медицински центар Велес. 

Тој брои дваесетина лекари и медицински сестри, кои  се горди што девојчињата  на 12 годишна возраст од општината ја прифатиле и ХПВ вакцината и дури  90 од нив ја примиле, наспроти одбивноста во останатиот дел од земјава.