Петар Печков

Објавено: среда, 17 март 2021 884 119

Високата бројка на ново заразени во велешко,  60 лица позитивни на ковид-19 регистрирани денес, беа причина да се отвори за пациенти модуларната ковид болница во Велес, која има капацитет од 47 кревети.  Зголемен е и бројот на згрижени пациенти во Општа Болница, на Инфективното и Интерното одделение.   

„Од денес во функција е пуштена и модуларната болница во истата има хоспитализирано 16 пациенти, додека   на  Инфективно   одделение се  32 а на Интерно десет пациенти.  На  кислородна поддршка се 21 пациент“ - кажа д-р Елеонора Јованова портпарол на Општа Болница Велес.

Бројот на хоспитализирани пациенти значително се зголеми во текот на изминатата недела,  но и покрај тоа болницата располага со доволно сместувачки капацитети и кадровски потенцијал се со цел успешно и континуирано справување со ковид пандемијата, објаснуваат од велешката Болница.

Иако при отворањето на модуларната Болница за ковид пациенти во Велес, на 20-ти февруари, министерот за здравство Венко Филипче најави дека за две три седмици ќе стигнат дигитален рендген парат и апарат за ехо дијагностика, нив се уште ги нема.  

 „Набавката на овие апарати касни поради блокадата од страна на опозицијата, во време на техничката Влада, за одобрување на заемот. Постапката е при крај, кога ќе стигнат апаратите ќе бидат дистрибуирани до сите вакви модуларни болници“- рече министерот Филипче, на денешната прес конференција.