Петар Печков

Објавено: понеделник, 23 февруари 2026 2204 10

Чист понеделник традиционално годинава се одбележа на Мегдан. Гости намерници или случајни минувачи  се дружеа на  чистинката од ова познато велешко маало.  Домаќините, кумовите  Никола Крстев и Лучијано Чорев беа задолжени за организацијата, набавката на ручекот и масите да бидат полни со потребната храна. 

„Наша обврска беше да обезбедиме храна, пијалак, салати за сите гости. Обезбедивме 10 кг грав, има и риба“ – рече Чорев.

Масите беа полни со гости, годинава млади кумови многу од гостите од помладата популација.  

„Не каниме некој посебно, кој дојде е добредојден, најчесто мегданчани се гости. Има доволно храна за сите. Од пладне стигнуваат првите  гости“ кажа Крстев. 

Во 90-тите години од минатиот век ова одбележување  го обнови Ицо Картуш, во името на претходниците Ѓорѓи  Балкан, па дојде Тоцинот, Гајдата Тоде Раштанецот, 

 „Како дете памтам ова се правеше каде е сега дуќанот на Чоревци. Ќе донесеме од дома чинијата, ќе застанеме на ред како деца, ќе добиеме и јадевме. Остана споменот и предизвикот да се обнови, драго ми е што успеав. Да потсетам колку значење има овој ден за Мегданчани, доказ е што домаќини биле тукашни кои се отселиле во Финска, во Швајцарија, но дошле за денот и организираа и се дружеа“ – раскажа Ицо.

До година за кумови се пријавиле Саше Манасков и Тоше Манасков.   

Од годинава има нов кувар за белиот грав, откако почина Тоше Бшката, Тодор Иванов, кој со децении го подготвуваше ручекот. Тоа е Димитар Минов, мегданчанец.

„Традицијата останува, се подготвува бел грав, како што е редот. Годинава ми е прв пат, претходно на Тодор помагав и дојде редот да го спремам годинава,  подготвени се десетина килограми бел грав“ – рече Димитар.