Петар Печков
Објавено: вторник, 14 април 2026
Нов апел за недостаток на антидијабетна терапија испорачаа пациентите дијабетичари, откако пред три седмици на 25 годишнината на одбележувањето на Сојузот на здруженија на дијабетичари на Македонија (СЗДМ), тие алармираа за проблемот. Ниту по дваесетина дена проблемот не е надминат и решен а најпогодени се децата и младите. Проблемот кој е од почетокот на годинава, продолжува.
„Пациентите со дијабетес во Македонија последните седмици се соочуваат со сериозен проблем на недостаток на антидијабетна терапија за новите и постојните пациенти, инсулин има. За тип 1 нема сензори, нема глукомери. Апелирам до Министерството за здравство, после празниците да се надополни количината, да стигне до сите пациенти. Посебно да ја забрзаат дистрибуцијата на лентите, сензорите, глукомерите за децата и младите“ – кажа Димче Велев, претседател на СЗДМ.
Корисници на антидијабетната терапија во Македонија се околу 40 илјади пациенти. Во Македонија се регистрирани околу 140 илјади лица со дијагноза дијабетес, 4 илјади се со тип 1 автоимуна болест, што подразбира современи методи за континуирано мерење гликемија.
Од Министерството за здравство тврдат дека извршиле набавка на глукомери кои биле доставени до аптеките а во тек е постапката за набавка на сензорите.
„Од минатиот месец во сите инсулински аптеки, доставени се најсовремени глукометри и ленти за мерење гликемија. За сензорите за континуирано следење на гликемија, во тек е јавна набавка на истите и обезбедена е дополнителна количина за 150 пациенти, односно од досегашните 650 пациенти, по завршување на јавната набавка сензорите преку програмата ќе бидат достапни за 800 пациенти. Согласно законските процедури за јавната набавка во моментот течат административните рокови за жалба“ – соопштија од Министерството.
На секои две години, во првите месеци од годината, се чувствува недостиг на антидијабетна терапија. Недостатокот се објаснува со доцното распишување на тендерите и лошото планирање од Министерството за здравство.
| Tweet |
