Петар Печков

Објавено: четврток, 23 февруари 2023 3709 50

Општина Велес ги преброи дивоградбите во долниот тек на реката Бабуна, од вливот  во река Вардар до месноста Пешти. Дивата населба која се создаваше со години и децении, и ниту една локална власт досега не најде начин и сили да ја сопре градбата,е цел на жестоки реакции на граѓаните, дека институциите не реагираат навремено.

„Градежните инспектори заедно со комуналниот инспектор и инспекторот за домување при Општина Велес излегоа на лице место во локалитетот – месноста Бабуна и неколку дена правеа увид на фактичката состојба во однос на бројот на изградените објекти на тоа подрачје. Од увидот на лице место е констатирано дека во локалитетот – месноста Бабуна се изградени 108 објекти и поставени се 16 приколки“- информираа од локалната власт.

Ова е прв пат по толку години локалната власт да  изврши регистрација на дивоградбите во овој локалитет, кој беше заштитено подрачје, но таму никна дива населба.

За решавање на  проблемот се чека донесување на Законот за легализација на дивоградби.  За дивата населба реагираше  советникот, Игор Смилев.

„За да добијам струја за просторија, која е легална, ЕВН ми бараше документи за чие обезбедување беа потребни денови и недели. Моето прашање е како овие дивоградби добиле електрична енергија и како ЕВН  тоа го толерира, имаат ли тие важечки документ, како и сите други граѓани?“ - кажа Смилев.

Друг советник, Драган Димевски ја актуализираше состојбата со градба на пешачката патека на езеро Младост, во месноста Бела вода. Тој праша дали објектот е легален и што се презема доколку е дивоградба. Градоначалникот Колев го поддржа Димевски, во санкционирање на состојбите со дивоградбите.  

„Ова е тест за локалната власт. Случајот ќе се испита,за да не ни се  случи овој дел од крајбрежјето на езеро Бабуна да биде втора Бабуна“ - кажа Колев во одговор на поставеното советничко прашање.

Засега на овој објект не бил извршен увид, за  да се види дали е дивоградба или не.