Петар Печков

Објавено: среда, 28 јуни 2023 2679 35

Рецитирајќи ги стиховите од Татунчо, на Рацин, „Ако куќа не направив со високи шимшир порти, куќа цел свет братски ми е братски срце што отвора, срце - порта највисока, срце - куќа најширока“ евро амбасадорот во Скопје Дејвид Гир, ја отвори Европската  куќата во Велес.

„Ова е најдобра дефиниција, каква треба да биде една куќа. Се работи за духот на една куќа, за нејзината отвореност. И затоа ми е задоволство што сум тука во Велес, и можеме да ја отвориме Европска куќа.  Ова е место за младите но и за целата заедница. Тие не треба да зборуваат за ЕУ, туку тоа што е важно за нив тука,во градот“ - рече Дејвид Гир, амбасадорот на ЕУ во Скопје. При отворањето на Европската куќа, тој на велешани и порача,„добре дојдовте дома“.

Таа е петта отворена во Македонија, по Скопје, Крива Паланка, Струмица и Битола, додека две се во завршна фаза, во Струга и Тетово. Европската куќа е и место, каде ќе може да се организираат настани, културни манифестации, место каде ќе се промовираат европски вредности.

„Овој проект е многу значаен за Велес. Просторот се наоѓа на многу добра локација, таа е најголема Европска куќа во моментот во Македонија. Информацијата која стасува до мене е дека ќе биде посетувана, во неа ќе се случуваат добри работи, едукација, обука, тренинзи“ - рече градоначалникот Колев.

Во центарот на Велес, во просториите на некогашното кино 11 Октомври, пуштена е во функција Европската куќа. Таа  е на повеќе од 200 м2 користен простор, место каде младите но и жителите на градот ќе можат да дебатираат, разговараат за Европска Унија, но и за животот во градот, во земјата. Нејзината вредност е околу 300 илјади евра, средства од ЕУ.  Прв настан  со кој се отвори Европската куќа во Велес, беше изложба на осум уметника од помладата генерација ликовни автори,  од Вардарскиот регион.