Петар Печков

Објавено: понеделник, 13 август 2012 1292 317

                 Во велешкиот Основен суд паднаа првите пресуди за  закана и навреди изречени на општествените мрежи на интернет или по електронска пошта. Казнети не се големи, туку симболично парични, но остануваат пресудите по што голем број интернет фанови се предупредени дека навредите и заканите кои се упатуваат по електронски пат се  санкционираат.

Во првиот случај осуден е Игор К. за  кривичното дело навреда изречена на мрежата Фејсбук.  Тој на 13-ти јуни 2010-тата, како член на Организациониот одбор на Рациновите средби, незадоволен од текстот на новинарот  Владимир Тевчев објавен на А1 со навредливи зборови се нафрлил врз авторот, а што можеле да го прочитаат голем број негови пријатели, но и пријатели на Тевчев. Истите тие подоцна се јавиле како сведоци во судскиот процес, со кој била потврдена автентичноста на профилот на тужениот, иако тој негирал дека е негов и дека друг лажно се претставувал со неговите иницијали.

За ова тој е казнет со условна казна од сто евра, доколку во следните две години  го повтори делото. Соочувајќи со оваа новина за македонски услови, во Основниот суд во Велес процесот траеше невообичаено долго, две години, при што беа одржани дури 19 рочишта. Во обид за вештачење и докажување дека  Игор К. е авторот на навредливите зборови, побарана е помош и од мрежата Фејсбук. Тие пак барале возвратно други детали, потребни за македонската полиција за да докаже дека заканите се изречени од профилот на тужениот. Преписката заглавила а судијката Тања Милева, која ја донесе оваа прва пресуда во Македонија, неа ја темели врз основа на изјавите на сведоците и нивната потврдата за автентичноста на профилот на Игор. К.  

Неодамна во истата оваа институција на правдата,  Основниот суд во Велес беше донесена друга пресуда, поради закани изречени на интернет. Велешанецот Тони Јованов заради кривичното дело загрозување на сигурноста доби казна да плати на две лица по 25 илјади денари. Тој на тужителите  В. Ш. И А. Г. од граѓанското здружение ,,Зелена коалиција,, која се бори против рестартот на Топилницата на постојната локација, им испратил по електронска пошта навреди и закани по нивниот живот.

Инспириран оти неговите родители работеле во Топилницата и од неа до затварањето  тој добивал парче леб, решил да им се закани на овие членови на невладиниот сектор. При вештачењето извршено од МВР, на компјутерот од Јованов недвојбено било констатирано дека тој ги испратил пораките до тужителите, по што  е прогласен за виновен му е изречена и казната на двете лица да им исплати по 25 илјади денари оштета.

Изречената казна и до двата случаи е  скромна и минимална. Но таа испраќа силна порака до илјадниците корисници  дека и интернет, во било која форма е медиум и не може да се испраќаат насилнички, заканувачки, навредливи пораки. Ова е пионерски чекор во македонската судска пракса, но сепак некаде мораше да се започне – велат од Основниот суд во Велес, каде беа изречени овие казни, откако тужените беа прогласени за виновни.