Петар Печков

Објавено: сабота, 22 октомври 2022 3646 37

Основното јавно обвинителство во Велес донело  наредба за спроведување на истражна постапка против лице на возраст од 36 години, бидејќи постои основано сомнение дека сторил кривично дело – неовластено производство и пуштање во промет наркотични дроги, психотропни супстанции.

„Во својот дом  во Велес, осомничениот неовластено заради продажба држел наркотична дрога – марихуана во количина од 84,07 грама. На 19 октомври тој на две лица им продал 35 грама од дрогата за вкупен износ од 10.000 денари“ - соопштија од ОЈО Велес.

Поради опасноста осомничениот да се даде во бегство или да го повтори кривичното дело, како и да ја попречи истрагата со влијание врз сведоците, Основното јавно обвинителство Велес предложило да му биде определена мерка притвор. Судија на претходна постапка од Основен суд Велес го прифатил предлогот и на осомничениот му определи притвор во траење од 30 дена.

Претходно, МВР соопшти дека на 19 октомври  во периодот од 12.10 до 17.50 часот на улиците „Христо Тататрчев“ и „11 Октомври“, полициски службеници ги лишиле од слобода Т.Б.(36 год), Б.П.(36 год) и Т.Џ.(36 год) од Велес. Во домовите на Т.Б. и Б.П., биле извршени претреси со судска наредба. Притоа, во домот на Т.Б. биле пронајдени и одземени три пакувања со марихуана и дигитална вага, а во домот на Б.П. била пронајдена и одземена кеса со марихуана. Додека, при преглед кај Т.Џ. било пронајдено и одземено едно пакување со марихуана.