Петар Печков

Објавено: среда, 16 мај 2018 1809 262

Поројните дождови кои неколку дена во попладневните часови  интензивно паѓаа во Велес, придонесоа за прокиснување на една просторија од новата театарска зграда како и на спортската сала Гемиџии. 

Посебно лоша е состојбата со спортската сала, каде водата протекува на повеќе места, и на трибина кај публиката и на терен. Среќна околност е што деновиве таму  немаше спортски настан, оти ќе беше доведено во прашање неговото одржување.   Водата се собира со кофи, но вработените никако да престасаат да ја соберат и исфрлат.  

Санацијата на кровот беше завршена пред половина година. За жал кровот и натаму протекува. Затоа на изведувачот веднаш му реагирав, бидејќи сеуште е под гаранција, да ги изведе неопходните работи и кровот и водата да не протекува - рече  Златко Гуцев, директор на ЈП Парк Спорт, каде припаѓа салата Гемиџии. 

Минатата година на примопредавањето со претходниот директор на 27-ми  ноевмри дотогашниот директор Александар Табаков се пофали дека е решен крупен проблем со санирањето на кровот во салата, кој протекуваше со години, откако таа беше пуштена во употреба од 1982-та.  Санацијата заврши во ноември,  ја изврши МЗТ Инжинеринг Битола во вредност до  7,5 милиони денари и беше извршен технички прием. По шест месеци кровот повторно протече.  

Протече и во една од просториите на новата зграда на велешки  театар. Поточно во пералната, вчера вработените морале со кофи да ја собираат водата. Денес во просторијата уште беше присутна вода а по ѕидовите влага. Ансамблот на велешки театар е на турнеја по Бугарија  и директорот и техничкиот не се достапни за нивен коментар за ваквата состојба.