Петар Печков

Објавено: четврток, 20 октомври 2016 2475 305

Годинава во два наврати се работеше на археолошкиот локалитет ,,Велешко Кале,,. Стручни лица од Народниот музеј во Велес во јули и сега во октомври, работат на  разоткривање на тајните на Калето, кое како населба постоело уште од хеленистичкиот период.  Во овој период се истражува Горниот град – Акропола. 

Овој период работат две екипи, еден кај Акрополата а друг на  простор каде имаме евидентирано илегални дејствија и  според првичните информации таму станува збор за некропола.    Во јули работевме на  истражување на Акрополота и сега продолжуваме.  Врз основа на археолошките сознанија кои ги имаме, тоа е  местото од каде се развивал стариот град. Според расположливите податоци  станувало збор за хеленистичка населба, која опфаќала површина од 3 ха,  па се развила доцно античка населба. Таа имала големи одбранбени ѕидови, кои и денес некаде опстојале.  Во средновековниот период повторно тие биле искористени но зајакнати, со оглед  какво немирно време било тогаш – изјави Анита Василкова Мидовска, виш кустос во Народен музеј Велес.  

Со добиените сознанија, ќе се добие поцелосна слика, далеку од завршна, за тоа како се развивал овој град и кои биле градежните техники и стратешките позиции. Тие биле забележливи токму на Акрополата. Со овие истражувања, 70 отсто од Акрополата е  истражена, по што  би следеле конзерваториски работи, кои би го ревитализирале местото.  

Локалитетот ,,Велешко кале,, за прв пат е започнат да  се истражува во 1989 година,  познат е  на стручната јавност, но непознат за граѓаните. Се наоѓа над устието на реката Тополка во Вардар, и манастирот Св. Димитрија на влезот во Велес. Ископувањата кои сега се работат се финансирани од Општинскиот Буџет.  

На локалитетот археолозите пронашле значајни откритија меѓу кои најважни се гробница со црква и аквадукт кој го користеле жителите, а денес водоводот го употребува манастирот Св. Димитрија.    Последната жителка која живеела во Калето била баба Ката а нејзиното семејство Карталови било последно таму. По ова населбата останала празна а со годините се запустила.