Петар Печков

Објавено: понеделник, 24 април 2017 721 255

Изминатиот период во четирите акции на доброволно дарување на крв во четирите средни училишта во Велес беа  собрани  202  крвни единици.

На првата од четирите пролетни, што се изведе во средното стручно општинско училиште „Коле Неделковски“ на 27-ти март, својата хуманост преку доброволно дарување крв ја изразија 80 ученици од трета и четврта година, а на 28 март во ОСУ „Јовче Тесличков даруваа 36 ученици.

Третата акција беше изведена на 29-ти март  во средното стручно општинско училиште „Димитрија Чуповски“ во која беа собрани 48 крвни единици.  Последната се одржа на 21 април во Гимназијата ,,Кочо Рацин,,  каде се собраа 38 крвни единици. 

Очигледно, претходно одржаните предавања, од страна на професорите волонтери мотиватори  за крводарителство извршија големо влијание кај учениците. Покрај дваесетте крвни единици, што беа дарувани од крводарители од наставниот кадар, во семејството на големите хуманисти на овие акции се вклучија 118 ученици со своето прво дарување – велат од велешкиот Црвен Крст. Тој беше организатор заедно  со Институтот за трансфузиона медицина.

Во овој период на 24 март беше изведена акција за доброволно дарување крв  во гарнизонот ,,Алексо Демниевски Бауман,, на која даруваа 45 припадници на АРМ од кои  четири  беа жени, а за прв пат се вклучија во големото хумано семејство нови  19 дарители.