Петар Печков

Објавено: недела, 19 јануари 2014 3024 263

Меѓу стоте велешани кои скокнаа во реката Вардар, годинава најумешен беше Ангелко Здравев (33 год). Тој втор пат скока, лани за прв пат а годинава имаше среќа и го фати крстот.

Имав дамнешна желба да скокам по крстот, се одлучив за прв пат лани. А еве веќе втората година и го фанав. Пресреќен сум. Посакувам здравје и среќа, бериќет на сите што ги знам и не ги познавам – рече Ангелко кој е вработен во Жито Вардар.

Од Повардарската Епархија тој  доби златно крвче и Библија. Во следните 40 дена Здравев со крстот ќе ги посетува домовите на велешани а тие ќе го даруваат. Владиката Агатангел  им посака мири и спокој за сите верници.

Ви посакувам добро здравје,  добрини и убавини, среќа, мир и спокојство во Вашите души и срца, и домови. Почитувајте се со комшиите, пријателите, роднините.,подајте рака. Божјите заповеди велат да се почитуваме и сакаме – рече Владиката Агатангел Митрополит на Повардарската Епархија при МПЦ ОА.

Годинашен кум беше семејството Пепелашеви  а за до година се пријави  Орце Ристовски сопственик на  градежната фирма  Ива инжинеринг.   Здравев од градоначалникот на Општина Велес Славчо Чадиев доби ДВД а од ЈКП Дервен телевизор. Годинава за прв пат сите што скокнаа по крстот добија маички, кои беа донација од  ординацијата на д-р Владо и Мартин Хаџинаумови  и од аптеките Зегин. 
    

Празникот Водици (Богојавление) народот го празнува како еден од најголемите христијански празници, зашто на тој ден според верувањето Исус Христос е крстен од Свети Јован Крстител во реката Јордан. Со тоа на овој празник му се дава значење на крштевањето како една од повеќето свети тајни на христијанството.

Крштевањето значи и духовно раѓање, односно почеток на човековото живеење во верата. Затоа кумот се смета за духовен родител на крстениот и најблизок роднина. Со овој празник завршуваат не само дванаесетте т.н. Некрстени денови туку и циклусот зимски празнувања во кој спаѓаат уште и свеченостите поврзани со Бадник, Божик, Нова Година (Василица).

Водици се празнува два дена. Првиот ден 19 јануари, освен Богојавление и Водици уште се вика и Војордање и Машки Водици, а вториот ден 20  јануари, Собир на Свети Јован Крстител уште се вика и Женски Водици. Собор на Свети Јован Крстител, именден прославуваат Јовановци. Овој ден се вика уште и Женски Водици поради што главен збор во изведувањето на обичаите имаат жените.