Петар Печков

Објавено: понеделник, 18 септември 2023 2416 28

Апелациониот суд од Скопје, затворската казна на таксистот  Љубе Трајковски (67 год) од Велес ја намали од седум на четири години и шест месеци затвор.  

Трајковски беше осуден за делото „тешки дела против безбедноста на луѓето и имотот во сообраќајот“  за предизвикана сообраќајка, која се случи на 10 февруари 2020година, кога на железнички премин кај селото Ногаевци, додека минел преку пругата Градско - Велес, бил удрен од воз.

При тоа почина Мартин Ѓорѓиев (23 год) од Ногаевци а тројца патници беа тешко повредни. Сите тие беа лица кои таксистот ги   превезувал на дијализа. 

Основниот суд Велес на 10 октомври лани, преку судијката Габриела Гајдова изрече првостепена казна од седум години. Таа при изрекувањето на пресудата кажа дека „обвинетиот не ја почитувал поставената сигнализација, преминал во налет преку преминот, наместо да сопре бидејќи имало таков сообраќаен знак“ .

Според обвинителството делото  е сторено  со умисла, поради тоа што „обвинетиот секој понеделник, среда и петок, ги носел патниците на дијализа во велешка болница и знаел дека на критичното место има  железнички патен премин и тука  минува  воз“.

Осудениот Трајковски во текот на судењето ни малку не покажа сочувство. Мајката на починатото момче, Нада Ѓорѓиева по изрекувањето на пресудата рече дека возачот не се извинил, не изразил  сочувство. Обвинетиот Трајковски   тврдеше дека е невин, не се чувствуваше за виновен, а причини за сообраќајката наброи неколку.

„Возот возеше брзо, ниту свирна дека доаѓа. Околу железничкиот премин кој е обраснат, има многу џбунови и дрва, од кои нема прегледност дали иде или не воз“ рече Трајковски.

Апелација  Скопје одлуката за намалување на затворската казна ја заснова на возраста на осудениот. Бил роден 1956 година, бил пензионер  и поблага казна  би  ја овозможила целта на казнувањето. 

Претходно минатиот месец Апелација Скопје на истата судијка Габриела Гајдова, ја намали изречената првостепена пресуда  казната за сообраќајката во која почина 11 годишно девојче од 18 на 8 години затвор. Осудениот возач бил пијан, возел побрзо од дозволеното, сообраќајката ја сторил на пешачки и по настанот побегнал.