Петар Печков

Објавено: среда, 05 јануари 2011 803 430

Изминатите неколку дена од новата година во Велес драстично е зголемен бројот на болни со вирусни респираторните заболувања, претежно деца од претшколска и школска возраст. Епидемија на грип се уште не е прогласена.

Во амбулантите во Велес за преглед се чека и по неколку часа. Децата со компликации итно се праќаат на лекување и интензивна терапија во  Детското одделение при Градската болница во Велес. Дека двојно и тројно е зголемен бројот на  болни деца кои  лежат на ова одделение, за МИА потврди педијатарот д-р Зорица Гашева.

Лекарите информираат дека се чекаат наодите од биохемиската лабораторија и  мислењето на стручњаците од Заводот за здравствена заштита во Велес.

Епидемиологот д-р Билјана Трајкова од Заводот за здравствена заштита во Велес информира дека  в понеделник  очекуваат да добијат збирна информација од сите амбуланти во градот.

Според лекарите, добро е што децата се на зимски распуст, инаку бројот на заболените од вирусот би бил уште поголем.