Петар Печков

Објавено: четврток, 14 март 2024 1244 47

Возачите предупредуваат дека рехабилитираниот регионален пат Велес - Градско, за кој имаат пофални зборови за квалитетот, може за бргу време да биде оштетен. Тие како причина ги посочуваат тешките камиони кои наместо, по автопат ја користат оваа делница.

„Со затоплувањето и повисоките температури, асфалтот ќе попушти под тежината на камионите, кои натоварени со  земја, руда, метал, ќе го оштетат  коловозот. И пак се ќе биде по старо за кратко време“ - реагираат возачите, најчесто од Градско, кои патуваат до Велес на работа.   

Директорот на ЈП Државни патишта, кој заедно со министерот за транспорт и врски беше на увид на оваа делница вели дека, ваквата состојба не е само на рехабилитираната делница Велес - Градско, туку и на сите ново завршени изминатиот период.  

„Возачите на тешки камиони ја злоупотребуваат состојбата и наместо по автопат, возат по овие рехабилитирани патишта.  Затоа ги разгледуваме сите законски можности да ставиме ограничување на товарните возила, да не ги користат  овие регионални патишта. Тие се изградени за населението од околните места кои живеат покај патот во тие региони“ - вели  директорот Ејуп Рустеми, одговарајќи на новинарско прашање.