Петар Печков
Објавено: недела, 21 август 2016
Во Велес летно време е жешко, како под Вршник –тоа е блискиот рид, но и сад каде се пече леб. Има интересна легенда, меѓу постарите, слушната многу пати од различни соговорници, која се раскажува во градот, зошто во Велес е толку врело.
За да заврне во лето, велешани треба да го откопаат магарето, кое е закопано во велешките ниви.
Велес одамна бил град каде се изработувале цигли. Пред нив се правел плитар, со нив се граделе куќите. Тоа се непечени цигли, слаб материјал, од глина. И за да може тие да се испечат, тоа се прави природно на сонце, требало да не врне. И се раскажува дека мајсторите закопале живо магаре во месноста од каде се вадела глината и така сонцето греело и печело, па работата можела непречено да се одвива. Тоа било од мај до септември. И затоа се зборува ако сакаат велешани да им заврне, да го откопаат магарето, кое мајсторите го закопале за да се пече плитарот на сонце.
Оваа легенда е раскажана од постари велешани, сведоци кои ја пренесуваат со децении.
| Tweet |
