Петар Печков

Објавено: среда, 30 август 2023 1590 34

Дел од велешани се уште полнат вода од природните чешми. Таа е со променлив непостојан  квалитет иако водата од градскиот водовод ги задоволува критериумите за нејзиниот квалитет.  Чешмите чија вода е  епидемиолошки  загадена, се со поставено предупредување од страна на Центарот за јавно здравје Велес, дека водата не е безбедна за употреба.

„Природните чешми во Велес се епидемиолошки несигурни, со непостојан квалитет,со висок процент на бактериолошко физичко - хемиска неисправност. Кај нив се изолирани индикатори на фекално загадување, најчесто ешерихија коли и колиформни бактерии, предизвикувачи на заразни болести“ - вели спец. д-р Снежана Петрова од Центарот за јавно здравје Велес.  

Велешани најмногу вода за пиење,  полнат од природните  чешми во Башино село и кај Шорка кои се  најчесто со исправна вода за пиење, но има периоди од годината кога таа не се препорачува за консумирање. За да се прифати водата како здравствено безбедна, неопходно е лабораториските наоди од сите испитани параметри, да бидат во рамките на дозволените концентрации, утврдени со Правилникот за безбедноста на водата за пиење. 

Селските чешми во општината без исклучок биле со неисправна вода, во најголема мерка водоводите, бидејќи водата не се хлорира, оти нема соодветна апаратура. Квалитетот на водата  се оценува според органолептичките, микробиолошките и физички својства на водата.