Петар Печков

Објавено: вторник, 09 август 2022 1649 55

Велес иако покрај три реки, водите  на ниту од една од нив  не се препорачуваат за капење и рекреација. Таква мака имаат велешани ова лето , но и дваесетина години наназад. Водите на реката Вардар, Бабуна и Тополка близу Велес не се исправни за рекреација и за капење, посочуваат од Центарот за јавно здравје (ЦЈЗ) од Велес, кој го испитува нивниот квалитетот.

Единствено исправни се водите на езеро Младост и водите од Градскиот базен, покажале резултатите од мерењата во месец јули.

„Следењето се врши со санитарно хигиенски увиди на локалитетите кои се од здравствен интерес и се користат за рекреативна намена. Само водите на езерото Младост и водите на Градскиот базен се епидемиолошко сигурни. Тие можат да се користат за капење и рекреација“ - соопштија од ЦЈЗ Велес.

Реката Бабуна, во нејзиниот долен тек  не е дозволена за капење. Следењето на квалитетот на водите се врши на едно мерно место  викано „Прва плажа“, кај фудбалското игралиште.  Водите на река Бабуна се во трета класа по бактериолошка контаминација. 

Испитување на квалитетот на водите на река Вардар  кај Велес се врши на две мерни места,  на влезот кај мостот на Башино село и на излезот  кај Долни Дуќани.  Анализите покажуваат дека водите се во четврта класа по присуство на амонијак и бактериолошка контаминација и истите не треба да се користат за капење, рекреација и наводнување.

Реката Тополка во долен тек, пред вливот во река Вардар  е во трета класа по бактериолошка контаминација и не треба да се користи за капење.

Испитувањата на квалитетот на водите од езеро Младост се врши на четири плажи и сите тие одговараат на бараните микробиолошки критериуми.