Петар Печков

Објавено: четврток, 30 април 2020 1476 148

Сите седумдесет и четири лица кои 15 дена  престојуваа во државен карантин во хотелот „Монтенегро“  кај Велес, си заминаа дома.  Тоа беа македонски државјани кои допатуваа со лет од Брисел- Белгија, на 10-ти април.  Дека во хотелот нема повеќе гости потврди и сопственикот Зоран Тодoровски.

Сите заминаа а дали ќе престојуваат нови лица во државен карантин, зависи од Министерството за надворешни работи, ако организира ново враќање на македонски државјани од трети земји во Македонија - рече Тодоровски. 

Оваа информација ја потврди портпаролот на ЈЗУ Општа Болница Велес д-р Весна Николовска Неделкова,  бидејќи доктори од таму, заедно со колеги од ЈЗУ Здравствен дом,  беа задолжени да ја следат здравствената состојба на лицата кои престојуваа во хотелот две седмици. Од Инфективното одделени при велешката болница, како оздравени пуштени се и двете лица, кои има ковид-19 а беа дојдени со оваа група.

Лицата беа негативни на двата контролни теста на ковид-19 па и тие го напуштија одделението и си заминаа - изјави д-р Николовска Неделкова. 

Во хотелот „Монтенегро“ претходно престојуваа и 45 лица кои во март месец се вратија со лет од Загреб- Хрватска.