Петар Печков

Објавено: вторник, 07 април 2015 1734 264

Зголемениот број на заразени од хламидија во Велес во втората половина на минатата година не е резултат на зголемената сексуална активност или премената на партнерите, туку на  статистиката.

 Ова е објаснувањето кое дојде од Центарот за Јавно здравје од Велес, откако  тие  во писмената информација доставена до Советот на  општината преку бројки констатираат дека  хламидијата високо котира кај заразните болести во градот.  

Според пронајдените случаи во вторите шест месеци, хламидијата во Велес  е на високото второ место, зад ентероколитисот, некој месец со   сипаниците друг со грипот, но постојано  во врвот. 

Наглиот пораст на регистрирани случаи на  хламидија во Велес не се должи на други фактори, освен на статистиката.  Министерството презеде активност за заштита на  трудници и на жени до 35 години, за скрининг на  присуство  на  оваа бактерија.  Се испитуваше поради тоа што се јави  голема брачна неплодност. Поради тоа се   започнаа  масовни испитувања. Немаме податоци од минатите години каква била состојбата, лани се вршеа прв пат испитувања и се најдоа поголем број  носители.   По некоја година ќе може да се изведуваат било какви заклучоци, сега е рано.  Единствената причина за поголемиот број регистрирани случаи е спроведено почетно и  масовно  испитување - вели д-р Флорентина Шурбевска Ристовска директорка на Центарот за Јавно здравје во Велес.  

Хламидија е сексуално пренослива болест, која може да доведе до неплодност ако навреме не се лекува. Преку мајката може да се пренесе и на новороденче.