Петар Печков

Објавено: сабота, 30 март 2013 767 289

Кога се работи за болни од рак, ретко кој се осудува да зборува за дефинитивно излекување. Но, современата медицина, поточно онколозите сега повторно најавуваат дека се на праг на еден нов метод на навремено откривање и со тоа ефектна терапија на лечење. Се работи за уште подлабоко дешифрирање на клетките на тумор врз чија основа научниците се надеваат дека идните терапии можат да станат уште поиндивидуални и со тоа поефективни.

 Верувам дека се наоѓаме на почеток на еден нов период на подрачјето на онкологијата следните десет, дваесет години – рече претседавачот на Германскиот центар за истражување на рак во Хајделберг, Отмар Вестлер пред Светскиот ден на борба против ракот.

Целосна секвенција на клетките

Иако истражувањата на овој вид не се нови, овој огранок од медицината како што се чини, се уште се наоѓа на почеток на својот развој. Дешифрирањето на клетки на тумор беше важен чекор. Она што е ново и што всушност влева нови надежи е фактот што за научниците денес е можно во целост да ги дешифрираат клетките на тумор. Овој процес се нарекува целосна секвенција на клетките.

Проблемот е во тоа што не е секој рак ист. Постојат повеќе од 200 различни видови на заболувања, а и тие се разликуваат од пациент до пациент – вели Вестлер. Меѓутоа, наведената целосна секвенција на клетки овозможува откривање и на најмали промени во клетките на тумор кои во некои групи на пациенти заболени од рак сепак се исти. Како што вели Вестлер, тоа е појдовна точка на новите истражувања, т.е. примена на оваа нова метода. Првите успеси веќе се гледаат и тоа во терапијата на карцином на дојка и на црн рак на кожа.

Но, наспроти тоа и во иднина ќе се користи хемотерапијата – вели Хаген Пфундер од компанијата Роше Фарма АГ.

Нови податоци – што со нив?

Од друга страна овој нов метод отвара и некои сосема нови прашања. Имено, со целосната секвенција на клетките на тумор, науката доаѓа до голема количина на нови податоци кои не даваат само информации за карциномот туку на пример и за тоа од кои наследни болести некој е заболен. Сега секако се поставува и прашањето: Дали треба на пациентот да му се кажат тие информации или подобро тоа воопшто да не го знае? Што воопшто смее да се прави со тие податоци, т.е. информации? По овие прашања мислењата многу се разликуваат. Во Хеиделберг затоа е основана една посебна етичка комисија која треба да даде одговори на овие прашања – вели водителот на сектор за молекуларна генетика при Германскиот центар за истражување на ракот, Петер Лихтер.

За сега останува отворено и класичното прашање околу трошоците. Имено, целосната секвенција е скапа, а чувањето на голема количина на податоци бара нови и големи капацитети. Освен тоа, лековите во тој случај исто така би станале многу поскапи бидејќи еден вид лекови можат да ги користат само мала група на пациенти. Но, од друга страна иако трошоците по пациент би се зголемиле, со оглед на подобрата прецизност на терапијата, ќе нема многу грешки со што на ова поле трошоците секако ќе се намалат.

преземено од Дојче веле - Бон