Миле Поп Јорданов е роден 1877 година, во семејство на револуционери и видни претставници на македонската авангарда. Во македонската историја е запишан како истакнат револуционер а како член на ТМРО, дејствувал во реонската чета во Радовишко. Од неговото семејство со значајни револуционерни дела и подвизи се истакнуваат и негови браќа гемиџијата Јордан Поп Јорданов - Орцето и Петар Поп Јорданов. Својот живот го завршува на 24 годишна возраст во близина на Велес. При заседата од страна на турските власти за да не падне жив во рацете на непријателот Миле Поп Јорданов се самоубива. Неговата трагична смрт е опеана во народната песна „Болен ми лежи Миле Поп Јорданов“ која Општина Велес ја прогласи за официјална химна на град Велес. долги години гробот на Поп Јорданов беше оставен на забот на времето и заборавот, за да во почетокот на 90-те години од минатиот век на иницијатива и во организација на Општинскиот Комитет на ВМРО-ДПМНЕ од Велес, биде возобновен и на тој начин достоинствено му се оддаде почит на велешкиот борец за слобода кој својот живот го даде за својот намачен и поробен македонски народ.