Петар Печков

Објавено: вторник, 11 мај 2021 550 125

Проблемот со отпадни води во реката Тополка, во нејзиниот горен тек, каде завршуваат фекалиите од населени места, не  е решен иако ХС Лисиче постои 15-тина години. Реката се влева во езерото Лисиче, од каде велешани се снабдуваат со воза за пиење.  Отпадните води од Горно и долно Јаболчиште, кои заедно бројат повеќе од пет илјади жители, ја полнат Тополка.  Проблемот го актуализираше градоначалникот Аце Коцевски.

„Има проблеми со водите кои се влеваат во езерото Лисиче, затоа што не е изграден колекторски систем и пречистителна станица за прифаќање и третман на отпадните води од селата кои се наоѓаат над браната. За водата што ја пијат велешани  да биде квалитетна, се внесуваат хемиски средства и затоа е потребно да се реши овој проблем, кој е скап но важен“ - кажа Коцевски.

Проекцијата за демографскиот развој на двете населени места Горно и Долно Јаболчиште, кој со пет илјади жители е достигнат сега, бил предвиден за 2035-та година.  Решението е изградба на канализационен и колекторски  систем, со изградба на две пречистителни станици за двете населени места, за што постоела и проектна документација.  
 „Во овие две населени места  нема канализационен систем за одвод на отпадните води, туку септички јами. Ова е комунален проблем на Општина Чашка а последиците ги трпат ЈВП Лисиче и Велес. Преку Вардарски плански регион е изготвен проект, за решавање на овој проблем, кој е во Општина Чашка. Неговата вредност е 2,3 милиони евра, останува да се најдат средства за негова реализација. Граѓаните треба да знаат дека немаме сериозен проблем со квалитетот на водата за пиење која се испорачува на велешани , ниту во скоро време може да се случи“ - рече Дејан Арсовски, директор на ЈВП Лисиче.

Од езерото Лисиче со вода за пиење се снабдуваат освен жителите на Велес и повеќе приградски населби и  села во велешко.