Петар Печков

Објавено: четврток, 21 јули 2011 772 368

Во велешката  населбата Горно Оризари екипите на ЈКП Дервен откриле голем број злоупотреби на водоводната мрежа, водата наместо за пиење се користела на диво, за поење стока и за поливање ниви.

Во голема акција која  неколку дена ја спроведуваат контролорите, инкасаторите и вработените во Р.Е. Водовод  од 50 извршени проверки кај 25 домаќинства е откриено злоупотреба.  Кај овие сопственици  откриено е дека водата за пиење се користи за други цели, затоа што водомерите покажувале потрошувачка од само неколку кубни метри вода месечно, иако овие домаќинства поседувале фарми со домашни животни, ниви и градини под фолии, за што е потребно огромно количество вода.

Кај нив е утврдена е манипулација со мерните инструменти, скинати се пломби на водомерите и на осигурувачите, комплетно се извадени броилата, дури  водомери се затрупани со земја. Дел од потрошувачите нелегално биле приклучени на водоводната мрежа, и не само што не плаќале за потрошената вода, туку и водата за пиење ја користеле за наводнување на нивите и градините и одржување на шталите. Како резултат на овие незаконски дејства, водата за пиење  која се користи ненаменски, делови на селото немаат вода и по 12 часа дневно.

Против сите сопственици на броила кои ја злоупотребуваат водата, ЈКП Дервен ќе поднесе соодветни прекршочни и кривични пријави. Од ЈКП Дервен најавуваат дека акцијата ќе продолжи и во наредните денови и со цел  летово вода за пиење да имаат сите жители на населбата Горно Оризари, кое брои три илјади жители.