Петар Печков

Објавено: петок, 09 декември 2011 801 228

Од сите краишта на Велес во црквата .Св. Ѓоргија  претпладнево  се слеваше многу народ, кои дојдоа на неговиот патрон ден да запалат свеќа за здравје и го посетат овој храм кој има култно место кај велешани.

Верскиот објект тешко ќе се распознае меѓу останатите куќи на улицата Богдан Каракостев  доколку не е таблата поставена пред двесетина години, на куќата со бр.14  на која пишува  ,,Тука 1857-та година, со средства на жителите од брзоречката општина е основано првото класно трговско училиште во Македонија“.   Тоа се смета дека  е почетокот на учењето на мајчин јазик на децата во Велес но и во Македонија, и почеток на класното образование.

Токму поради тоа параклисот Св. Ѓоргија е значаен во македонската култура и историја, бидејќи  1857/58 е почеток на работа на велешката Гимназија, најстарата во земјава. Во овој храм  освен што Џинот предавал на македонски јазик, се изведувале и првите едночинки, чиј автор бил токму тој. Вратите на параклисот се отвораат два пати годишно напролет на Ѓурѓовден,  и на есен на Св. Ѓоргија.

И оваа година река од велешани се слева по тесните улици, поплочени се уште со калдрма за да дојдат и го посетат параклисот. На простор не поголем од 20 метри квадратни илјадници луѓе минуваат, но малкумина знаат дека тука некогаш било училиште. Тоа било на два ката, приземјето за машките деца а горниот за девојчињата.

Иако минал век и половина, објектот е добро сочуван, но дел од иконите се оштетени. Тие се сведоците на времето кога тука децата за прв пат започнале да учат на мајчин македонски јазик а нивните родители ја одржувале  православната вера.