Петар Печков
Објавено: среда, 04 септември 2024
Претпладнево велешани дишеа воздух кој беше високо загаден. Мерните инструменти на Министерството за животна средина (МЖС) покажуваа високи часовни параметри за опасните ПМ 10 и ПМ 2,5 честички и за јагленмоноксидот. Екологистите посочуваат дека причината за ова се пожарите во близината на градот.
„Градот е окован во чад од огромниот пожар на планините Мукос и Бабуна во Општина Чашка“ – кажа Игор Смилев кој е дел од ЕГ „Зелена сила“ член на Советот на Општина Велес.
Од високите делови во околината на градот пожарот на овие две планини се гледа и е забележлив. Димот кој се шири од нив стигна и до Велес. Но не само велешани имаа проблеми со високите концентрации на штетните материи. Тешко се дишеше и во населба Чашка и селата во околината, во регионот на Азот. Планинското село Богомила е во чад.
„Како среде зима, се гледа на 20 метри пред нас. Толку чад има. Ова е втор ден со ваква состојба. Очигледно дека ова е од пожарот на Мукос“ - вели жител на Богомила.
Мерните инструменти на МЖС покажаа дека во првите два дена понеделник и вторник, на 2 и 3 септември имаше големо загадување на воздухот. Беа измерени вредности до 80 мг/м3 што е повеќе од дозволената вредност од 50 мг/м3.
Началничката на службата за итна помош д-р Василка Пановска, кажа дека овие два дена немало пациент кој побарал помош поради проблеми со дишењето а поради загадениот воздух.
Пожарот на планината Мукос кој има три краци, кон селата Степанци, Ораов дол и кон Оморани пламти од 27 август. Бидејќи е високо, близу до врвот на тешко достапен терен, досега не е локализиран.
„Во моментот само вработените во Национални шуми Подружница Бабуна се на терен и се справуваат со пожарот. Сооглед на актуелната состојба со големиот пожар во Прилепско-Мариовско, сите сили и ресурси се насочени кон помош и подршка во гаснењето на истиот“ – информираа од ЦУК.
Истиот пожар беше активен до 18 август, претходно 12 дена гореше шума а беше изгаснат од дождот кој тогаш падна.
фото Богомила ФБ/ Стојан Ристовски
| Tweet |
