Петар Печков

Објавено: четврток, 16 декември 2010 733 344

Зачестените изјави за работата и компетентноста на матичните гинеколози, изнесени во повеќе наврати од страна на Министерството  за здравство и Гинеколошко акушерската Клиника во Скопје се директен атак врз  нашиот углед и кредибилитет кај   пациентите, сметаат од  Здружението на вон болнички гинеколози, кое постои при Здружението на приватни доктори на Македонија.

Неаргументирани, паушални  и штетни  се нападите  во јавноста за нашата стручност и компетентност, кои се пласираат од страна на Министерството и Гинеколошката клиника. Подготвени  сме за средба, усогласување на ставовите  и аргументирана расправа за сите отворени прашања со министерот и сите структури кои сега ја оцрнуваат нашата професија. Очекуваме заедничка средба за надминување на проблемите помеѓу  Министерството за здравство,  нас вон болничките гинеколози,  и отуѓениот центар на моќ Фондот за здравствено осигурување – велат  стотината приватни матични гинеколози. 

Тие го поддржуваат воведување на алтернативните  протоколи заради адекватна и сеопфатна грижа  на најранливата популација, трудниците  и новороденчињата.  Но чувствуваат несогласување помеѓу Фондот за Здравствено  осигурување и министерството  во остварување  и креирањето на здравствената политика кај жените. За приватните гинеколози состојбата во вон болничката  гинекологијата во државата е одраз на севкупните состојби во здравството.

Ранливоста на популацијата, трудници и новородени  со која тие работат, ги чини работите  посензитивни. Приватните  матични гинеколози реагираат и на искажаните ставови на професорите од Катедрата за гинекологија, каде токму таму и од нив го здобиле знаењето и лиценцата за работа, кое сега тие им го доведуваат во прашање.