Петар Печков
Објавено: недела, 09 февруари 2014
Сакав да Те сретнам
Барем еднаш, О Боже
Огин да ми дадеше
Светлина в џеб скрита
Да облечам лица
До студенило облека што носат
Да и однесев
Душа да стоплат, О Боже
Сакав да Те сретнам
Да Те замолам
На распетје
Од најтврда болка изделкано
Пред време
Да не ја распнувам минливоста
Небаре барјак Македонски
...греота е
Сакав да Те сретнам, О Боже
Ука да ми дадеш
Како да препознам
Играта нечесна
Ороводци неумни што ја водат
Тапан да им дупнам
Зурла разуздана да им сотрам
Сакав да Те сретнам
И да Те прашам
Каде се вари алчноста
Казан да им ничкосам
Грнци да им скршам
И в пепел да ја закопам
И ова да Те прашам
Кој мене пат ми кажуваше
Везден да одам
И сал загубен да бидам
А Те барав на секаде
Те барав по сокаци и ќорсокаци
По одаи старински
По гробишта
По кафеани смрдливи
Во вински чаши превртени
По ридишта
По реки
Шуми
Низ цел свет Те барав
А Ти во мене
...и не Ти се лутам да знаеш
Љубљана ноќта на 30 јануари 2013
Ѓорги Бисерков Дампе
| Tweet |
