Петар Печков

Објавено: вторник, 19 јануари 2021 3975 123

Годинава поради ковид заразата го немаше традиционалното фрлање на крстот во водите на реката Вардар во Велес. Но затоа група млади момчиња, Дејан Петрушев, Орце Весов и  Ане Мирчевски, симболично влегоа во водите на реката Вардар за да го одбележат овој ден, Богојавление.   Иако од страна на МПЦ-ОА не се фрлаше крстот, оваа група самоиницијативно го одбележа денот Водици.

Не смееме поради пандемијава да се откажеме од нашите традиции, вредности и од нашата православна вера. Затоа со ова влегување во река Вардар симболично го одбележавме Водици - кажа Орце Весов.

Оваа група лани го фати крстот од водите на река Вардар во Велес.

Годинава  осветувањето на водите во велешко  се изврши во црквата „Успение на Пресвета Богородица“ во Велес, каде  во понеделникот навечер се отслужи Вечерна со Василиева Литургија, а потоа во сослужение на присутните свештеници Митрополитот Повардарски  Владиката Агатангел ја освети водата за здравје и спасение на верниците.