Петар Печков

Објавено: среда, 16 август 2023 433 37

Еколошкото друштво Вила Зора од Велес подели на Детската градинка од градот 10 електрични апарати кои произведуваат компост од органски отпад. Со компостирањето се овозможува да се врати органскиот материјал во почвата од каде што потекнува, по истиот тек како што се создава во природата.

„Апаратите компостери се исклучиво за органски отпад, отпадоци од органска храна. Се тоа што се употребува како храна во градинките и што останува, се употребува во компостерот. Процесот во апаратите  трае 5 пет и пол часа“ - кажа Сашка Коцевска од ЕД Вила Зора,
Компост е ѓубриво кое се добива од разни видови органски отпад како што се лушпи од зеленчук и овошје, трева, лисја, слама, пилевина, талог од кафе и чај. Овие материи се разложуваат и создаваат органски хумус кој може да се користи во нивите и градините.

„Со проектот се развива еколошката свест кај децата, свеста за штедење енергија, свеста за рециклирање, свеста за употреба и користење на органскиот отпад “ рече Славица Алексовска психолог во Детската градинка „Димче Мирчев од Велес.

Овој проект „Селектирај -компостирај“  за прв пат во Македонија се реализира во Велес. Интерес за негова примена пројавиле и средните училишта од градот.  За почеток се едуцираа децата од градинката „Димче Мирчев“.

„Кога се покрева јавната свест, најуспешно е ако е од  децата, мали нозе. Токму затоа се одлучивме за децата од градинките дополнително, во градинките се подготвува храна и има органски отпад“ рече  Олгица Наумоска од ЕД Вила Зора.  

Проектот е  финансиран од ЕУ и кофинасиран од Општина Велес.