Петар Печков

Објавено: четврток, 01 февруари 2024 241 34

Министерството за култура додели 50 милиони денари за поддршка на проекти од областа на културата во 11 општини од Македонија. Меѓу нив се и Велес и Чашка. Тие средствата ги добиваат по поднесени апликации.

Во Велес ќе се постават фотонапонски панели на локалната  библиотека „Гоце Делчев“. На овој начин објектот ќе може да ја користи сончевата топлина за енергија. (во објавата не е прецизирана вредноста која ќе биде доделена за овој проектот).

Општина Чашка ќе добие Дом на културата. Со 9,5 милиони денари кои ги доби Чашка за изградба на Дом на културата, во центарот на населбата, објектот ќе може да се доведе до карабина. Објектот ќе биде на површина од 1.100 метри квадратни на два ката, со мултифункционална сала, мала сала, библиотека, простории за невладин сектор, појасни градоначалникот Горан Стојановски

Општина Демир Капија добива околу 3 милиони денари за реконструкција на музејот каде ќе се создаде простор за креација, а според градоначалникот Лазар Петров, на тој начин се чува традицијата во ова мало гратче.

Средствата се доделуваат за обнова на стари, руинирани домови на културата, изградба на нови, уредување и доуредување на културни објекти,  за што за 11 општини Министерството за култура  одвои 50 милиони денари за поддршка.

Средства добија и проектите од  Битола, Крушево, Кривогаштани, Дојран, Богданци, Маврово и Ростуше, Делчево и Чучер Сандево.  Овие 50 милиони денари се од програмата за користење капитални дотации за инвестициони проекти во единиците на локалната самоуправа во областа на културата за 2024 година.