Петар Печков

Објавено: среда, 02 јуни 2021 2282 106

Криминалната група, со строга хиерархиска поставеност, била предводена од Р.Џ.(33) од Велес. Тој заедно со две лица со потекло од Блискиот Исток организирале криминална група во Македонија, која за време на своето делување, организирале криумчарење на мигранти, по потекло од Авганистан, Пакистан, Сирија, Бангладеш и други земји од Блискиот и Средниот Исток. Мигрантите биле илегално префрлани на територијата на Македонија од Грција, преку илегални премини на т.н. „зелена граница“ во околината на Гевгелија, Струмица, од каде потоа со помош на водичи т.н. „качаци“, координирано се доведувале на претходно утврдени и договорени локации.

Од овие локации организаторот на организираната криминална група договарал нивно преземање од страна на членовите на криминалната група, при што со патнички и товарни моторни возила ги превезувале до претходно договорените локации во Кумановско-липковскиот регион, a од таму преку територијата на Србија кон државите на ЕУ. Парите за пренесување на мигрантите биле исплаќани, преку агенти за брз трансфер на пари, но и во готово, а цената на транспорт по лице изнесувала од 500 до 700 евра.

Во текот на денешниот ден, МВР  извршила  претреси во објекти на 11 локации на подрачје на Велес,  Скопје, Штип, Струмица и Валандово, а лишени од слобода се шест лица, додека четири лица- членови на криминалната група веќе издржуваат мерка затвор, за претходно сторени кривични дела „криумчарење мигранти“. Од засега извршените претреси пронајдени и одземени се: пари, мобилни телефони, СИМ картички, половина килограм марихуана, како и други предмети од интерес на истрагата.

Приведени се Р.Џ. (33) од Велес, С.М. (27) од Штип, Џ.Ш. (30) од Штип, Џ.Р. (26) од Валандово, Г.П. (48) од Велес и З.Џ. (56) од Велес. Од претходно мерка затвор во КПУ издржуваат С.М. (39) од Велес О.Д. (47) од Велес, М.Р. (29) од Струмица и М.Ј. (29) од Штип, а се преземаат мерки за приведување на уште три лица. Во текот на денешниот ден до надлежното обвинителство ќе биде поднесена соодветна кривична пријава.

Надлежниот обвинител од Основното јавно обвинителство за гонење на организиран криминал и корупција, по добивањето на кривичната пријава, во текот на денешниот ден, согласно своите надлежности до судијата на претходна постапка при Основниот кривичен суд Скопје ќе достави предлог за определување на мерка притвор за осомничените.