речник контакт

Заев, Владата останува посветена на интеграцијата на Бошњаците во општеството

Во Горно Оризари со свечена академија одбележан 28-ми септември Денот на Бошњаците. Жителите на населбата побараа таа да добие спортска сала, како најголема бошњачка населба во Македонија

Петар Печков


Вчеравечер во Горно Оризари се одржа централната манифестација  во Македонија, за одбележување на 28-ми септември, Денот на Бошњаците. 

На академијата  пред бројните гости се обрати премиерот Зоран Заев, кој кажа дека  Бошњаците секогаш и во добро и во зло ја прикажуваат припадноста кон државата  и придонесуваат во изградбата и развојот на институциите на Македонија.

Ми претставува особено задоволство фактот дека од 2018 година, во нашиот мандат, во образованието на учениците Бошњаци им е вратено правото на редовна настава на босански јазик. Во овој мандат ќе ги формираме и националните совети на помалкубројните заедници, за да можете и вие Бошњаците да одлучувате што ви е вам важно и приоритет. Така ќе биде и за другите помалкубројни етнички заедници. Владата останува посветена на афирмација на културата, посебностите и традициите на секоја заедница во нашата земја, а во таа смисла и грижата за натамошна интеграција на Бошњаците во македонското општеството. Во 2017 и 2018 година нашата земја и Босна и Херцеговина потпишаа серија на билатерални договори, од кои издвојувам две важни работи: наскоро граѓаните на двете земји ќе почнат да се движат само со лични карти, студентите од Македонија во БиХ ќе можат да студираат како домашни студенти. И обратно - порача премиерот Заев.

Тој потсети дека денес босанскиот јазик е дел од програмата на Националната телевизија, а токму  во Оризари со децении се одржува значајната културно- спортска манифестација „Средби на Бошњаците“.

Претседателот на МЗ Горно Оризари Енвер Карталовиќ кажа дека населбата брои 1,7 илјади жители и уште  најмалку илјада живеат во Виена- Австрија а петстотини во други градови низ светот.

Сакам посебно да ја поздравам нашата дијаспора, не само од Оризари, туку и сите Бошњаци кои се надвор од државата, оти тие се нашата најголема сила, на населбата но и на државата.  Ако само за една година се изградат 10 куќи во Македонија од Бошњаци, тоа е  најмалку вложено еден милион евра во економијата. Ние сме малцинство во државата,  но не  сакам кога велат дека ние Бошњаците сме малцинство, ние сме граѓани како и сите други во оваа држава, бидејќи и ова е наша држава - рече Карталовиќ.

Тој побра како најголема бошњачка населба во земјава,  Горно Оризари  заслужува да добие спортска сала.

На академијата присуствуваа и заменикот министер за локална самоуправа Зоран Димитровски, градоначалникот на Велес, Аце Коцевски, како и гости од Нови Пазар и од Сјеница- Србија. Како дел до програмата настап имаше Хамза Шкриељ од Санџак и КУД „Лилијан“ од Скопје.

АНКЕТА »

Дали Општина Велес да се задолжи со 46 милиони денари, за да се изгради покриен Градски пазар?

Резултати

ПРИЈАТЕЛИ »