Петар Печков

Објавено: четврток, 24 септември 2015 3048 276

Велешките адвокати поднесоа кривична пријава за надриписарство, против непознат нотар од градот. Со кривичната се осомничени и две лица, продавач и сопственик на киоск во градот, кои продавале документи кои  не се изработени од адвокат.  

Имено на први септември, купувач од киоскот побарал и добил договор за купопродажба на автомобил, иако киоскот не бил регистриран за таква дејност.   Во тој момент како купувач бил присутен и  адвокат, кој побарал ист таков документ а откако  го добил, побарал фискална по што  му било објаснето дека не издаваат.  

На прашањето од каде е  документот за купопродажба, добил одговор од продавачот, дека документот е валиден  и  го работат во соработка со нотар од градот, кој не бил именуван.  Според подносителот на кривичната пријава, продавачот и сопственикот на киоскот дале стручна  правна  помош, без за тоа да имаат регистрирана дејност, а не се адвокати,  при што биле поттикнати со умисла од НН нотар од Велес.

Поради ова  до велешкото обвинителство е поднесена кривична пријава за три лица за надриписарство.   Зад неа се потпишани 46 велешки адвокати, кои бараат да се открие нотарот кој ја реализирал оваа  за нив нелегална зделка,  и колку вакви договори се склучени во градот, со што граѓаните ,,се оштетени од нестручна и несоодветна правна  помош,, пишува во кривичната пријава.