Петар Печков

Објавено: понеделник, 18 декември 2017 3684 229

УЈП на прес конференција ги објави податоците  од пријавите  за  Годишна даночна пријава за 2016 година. Неа ја поднеле 439.689 граѓани. На листите се најдоа и четворица велешани во ТОП 10 најдобро платените.

Најмногу пријавил велешанец по основ  заработка од дивиденди 66,33 милиони денари. На  врвот  е скопјанец со  заработка од 109.1 милиони денари.  Од повремено вршење на услуги, освен основната, жител на Велес заработил 58.2 милиони денари, додека на четврто место е друг велешанец со  заработени 32,39 милиони денари.

Четвртиот велешанец кој го нотира УЈП е на листата  остварени бруто приходи од имот и имотни права - издавање на земјиште, станови и деловни простории, превозни средства и друг вид на имот, кој пријавил  во 2016 година 17,99 милиони денари. На врвот  е обврзник од Тетово, кој пријавил 65.5 милиони денари.

Највисок годишен приход за 2016 е 255 милиони денари

За 2016 година, граѓанин од Скопје пријавил 255.4 милиони денари, што е и највисок годишен бруто приход искажан во Годишните даночни пријави за оваа година. Втор на листата, со остварен годишен бруто приход од 234.258.570 денари, исто така, е граѓанин од Скопје. На листата со највисоки приходи пријавени во Годишната даночна пријава за 2016 година има и граѓани од Струга со остварени 124.577.479 денари и од Кочани со остварени 95.796.120 денари.

Највисоката годишна бруто плата во 2016 година во износ од 167.786.446 денари е исплатена во приватното здравство, во Скопје, па потоа следат секторот трговија /производство на фармацевтски производи и препарати; неспецијализирана трговија на големо; компјутерско програмирање; производство на фабрикувани метални производи; производство на печки и горилници; специјалистичка медицинска пракса; и адвокатската дејност. Сите се од  Скопје, освен еден стружанец и охриѓанец.  

Највисокото „дополнително примање и надоместок од работен однос“ изнесува 25.6 милиони денари на годишно ниво, за скопјанец па богданчанец со 22,5 мил. денари. 

Највисока заработувачка пријавиле пензионери од Струмица и од Скопје, кои освен пензијата оствариле и приходи по други основи. Прворангираниот пензионер од Струмица пријавил 41,8 милиони денари вкупен годишен бруто приход по сите основи, вклучувајќи ја и пензијата. Највисок годишен бруто приход само по основ на пензија е пријавен во Скопје, и тоа 1.838.837 денари.

Интегрално  прес конференцијата на директорката на УЈП