Петар Печков

Објавено: четврток, 28 февруари 2013 820 299

Министерството за животна средина даде позитивно мислење  на документот на Општина Велес  со кој се предвидува  на местото каде сега е Топилница да има зелен појас. Ова е дел од постапката за промената на Генералниот Урбанистички план, преку која се предвидува  на тој простор да има 42 хектари шума и зелени површини. Од локалната власт велат дека има уште  работа  и документи, додека се заврши целата постапка.

Извештајот за Стратегиска оцена на влијание врз животната средина за Изменување и дополнување на ГУП  за град Велес каде сега е Топилница плански период 2012-2022 година,  од страна на Министерството доби позитивна оценка и е прифатен. Со ова „еколошкиот” дел од постапката е завршен. Во однос на „урбанистичкиот” дел од постапката, Советот на Општина Велес на седницата одржана на 14-ти февруари донесе Одлука за утврдување на Нацрт – планот. Во периодот кој следи активностите ќе бидат насочени кон спроведување на законските одредби согласно Законот за просторно и урбанистичко планирање до конечно усвојување на планот – изјавија од Општина Велес.   

 Во писмениот одговор од Министерството за животна средина кое го доставило до локалната власт  на Велес пишува дека немаат забелешки на документот и бараат негова доследна примена.

Извештајот за  стратегиска оценка на влијанието, ги содржи аспектите за заштита на животната средина, како и економските и социјални прашања во планирањето и имплементирањето на планот. Има и преглед на регулаторната рамка и процедури кои ќе служат за проценка на влијанието врз животната средина.    Утврдени се и мерките за заштита, намалување и неутрализација на негативните влијанија, како и план за мониторинг на животната средина – се вели до документот потпишан од министерот Абдулаќим Адеми.   

 Истовремено и Метрудхем ја води постапката за отворање на комбинатот, за што и тие имаат добиено позитивно мислење.  Пред една година кога започна ова активност, и на двете страни Општината и Метрудхем напоредно ги водат нивните битки за остварување на своите цели. Едните да се спречи да проработи  а другите Метрудхем да  започне да работи.  Тогаш во Велес се одржа трибина, на неа тогашниот републички инспектор за животна средина Филип Иванов пред присутните рече:

Клучен елемент   е доколку се изврши пренамена на локацијата каде сега се наоѓа Топилницата,  натамошната  постапка е беспредметна.   Процедурата за  изградба на тешка индустрија ќе биде оневозможена, бидејќи локалните власти предвидуваат со новиот план таа да биде наменета за  друго – рече во таа пригода Иванов.

По препорака на Министерството за здравство се напушти идејата таму да има лесна индустрија, туку единствено и само зелен појас на површина од 42 хектари.