Петар Печков

Објавено: четврток, 26 јули 2012 820 288

Во селото Дрма, општина Петровец денес на слобода беа пуштени три мали штрка. Тие останаа рано без своите родители , безбедно симнати од гнездо , згрижени во Скопската Зоолошка градина и за крај  пуштени во Катлановско блато каде има изобилство храна и  пријателчиња . Останува само да им посакаме многу среќа во животот.

Оваа вистинска животна приказна е дело на членовите на Здружението на бувови од Скопје.  Штркчињата биле пронајдени на 30-ти јуни годинава од селаните од Дрма, откако  неколку дена биле без храна и вода и оставени да умрат во гнездото, но биле спасени од Боби и Ана Арсовски од Здружението за заштита на бувовите во Македонија, кои ги чувале  неколку дена во дневната соба од својот стан и потоа ги однеле во скопската Зоолошка градина. Во спасувањето учествувале и екипи на ЕВН Македонија.

Неверојатна е приказната која жителите на селото им ја раскажале на спасувачите за судбината на малите штркови. Таткото и мајката на малите штркчиња го преживеале невремето од средианта на јуни, со град во кое десетина птици настрадале и за целото време не го напуштиле гнездото, а малите ги штителе со своите раширени крилја. Меѓутоа, по некој ден како што тврдат мештаните, еден од штрковите самиот се забил во далноводот кој бил под напон и починал. Другиот штрк околу еден час кружел околу него и околу далноводот и потоа го сторил истото. Трите мали штрка дваесетина дена беа згрижени во Зоолошката градина во Скопје и на 26-ти пушени во природа.