Петар Печков

Објавено: понеделник, 24 јануари 2022 4960 63

Неколку гробишта  во близина на црквата Св. Спас од Велес се сквернавени. Не мало било изненадувањето на блиските од починатите, кога неодамна  дошле и виделе дека  на гробиштата се копало а на некои се фрлени или скршени надгробните плочи.   

„Отидов на гробот од брат ми, на Св. Јован во четвртокот, кога гледам дека гробот од сопругата е ископуван. Земјата беше пресна, за разлика од соседниот гроб на  синот и братот. Се гледа дека била ископана па префрлена и вратена. Не можам да верувам дека некои лица барале нешто. Срамота и болно се мали зборови“ -вели велешанецот кој  доживеал големо разочарување кога во видел сквернавениот гроб.     

Тој прошетал во околината и констатирал дека не е  таков случај само со  гробот од неговата  сопруга. Има уште пет во близина, каде се гледа дека е свежо копано и пребарувано. Има и искршени споменици и дрвени крстови.

„Сите свежо сквернавени гробови се погребани лица под пред 10-тина 15 години. Ако добро се забележи сите се копани до пола, не во долниот дел, или е скршена плочата од гробот  во горниот дел. Тоа јасно кажува дека лицата што го сториле ова, барале накит, бидејќи во тој дел каде се копало,  се рацете на покојните и главата, каде може има прстени или ланчиња“ - вели соговорникот.

За него нема зборови со кои може да се искаже револтот. Верува дека повеќе лица го сториле овој вандалски чин, оти поединец не може сам, сигурно некој чувал и стража. Низ гробишта од црквата Св. Спас минува и локална улица, која е многу фреквентна, за жителите кои живеат во близина.  Од СВР Велес потврдија дека ваков настан е регистриран во полицискиот билтен и дека се работи на негово расчитување.

Пред две години, на почетокот од  месец февруари, по реакциите на граѓаните дека на гробиштата од црквата Св. Спас се вршат кражби и напади врз жени кои се во посета на гробните места, им се одзема накит и злато, во полициска акција беше пукано во полицаец во цивил. Тој беше застрелан со четири куршуми, сторителите беа уапсени и се наоѓаат на одлежување казна затвор.