Петар Печков

Објавено: понеделник, 17 јануари 2011 911 421

Велешките висококатници се малку заштитени во случај на пожар,  бидејќи недостигаат противпожарни скалила, заедничките тераси се полни од лесно запалив материјал а хидранти нема. Ова го покажа истражувањето за проектот на противпожарното доброволно друштво ,,Видра ,, од Велес. Тие посетија 30-тина висококатници во градот, од девет и повеќе катови, каде констатирале бројни неправилности, во однос на противпожарната заштита.

Во високо катниците има висок ризик за евентуални избувнување оган од повеќе причини. Пред се дотраената електрична мрежа, стара и по 30 години, запоставени се хидрантските мрежи, повеќето се украдени или неупотребливи. Во подрумските простории се чува лесно запалив материјал, течно и цврсто гориво, пластика, празни боци од плин, кој е потенцијална бомба, може секој момент да експлодира. На заедничките балкони има стар мебел, дрвенарија, иако овој простор во случај на пожар се користи од пожарникарите за гаснење, сега е окупиран и недостапен. Во овие простории се чуваат материјали  кои можат да предизвикаат повисоки температури а потоа и оган. Во малкуте згради каде има противпожарни скалила тие не се слободни, додека повеќето немаат, како пропуст на времето кога биле градени –  вели Љупчо Лепидовски претседател на ППД ,,Видра,,. 

Членовите на друштвото  делат флаери и одржуваат средби со граѓаните на кои непосредно им се укажува на опасноста од пожар во овие згради.

За жал состојбата не е ни малку добра. Во заедничките простории, терасите, станарите чуваат непотребни работи за кои не знаат што да прават со нив. Затоа е потребна заедничка акција на сите станари да ги исчистиме овој смет, во интерес на нашата безбедност и животи. Тие се претворени во магацини и се некорисни во случај на пожар -  вели Ката Ацева жителка на висококатница  на улица Ленинова.

Таа смета дека оваа акција на доброволците од ППД Видра е позитивен пример бидејќи ги анимира станарите и ги запознава со сите опасности при пожар. Во секоја висококатница во рамките на проектот, беше предаден противпожарен  куќен ред и мерки за заштита, кои ќе бидат поставени на влезот од објектот.

Безбедносната состојба е  многу лоша, зградите станаа ризични за живеење поради немање услови за противпожарна заштита. Секој кат имаше хидрант а сега се искрадени. Дали тие црева треба да завршат на некоја нива за полевање или  требаат за гаснење при пожар во зградата. Тоа е класичен криминал. Згора на тоа зградата нема протипожарни скалила,  бидејќи на времето  кога се граделе тоа  било премолчено, а денес гледаме дека тоа е крупен превид. Не дај Боже, како и што ќе биде ако пламне пожар, каде ќе бегаме  - Петре Трифунов жител во висококатница.