Петар Печков

Објавено: петок, 25 јуни 2021 814 92

Водата во Езерото Младост е исправна за капење и рекреација додека реката Бабуна во нејзиниот долен тек  не е за капење, покажуваат последните тестирања на Центарот за јавно здравје во Велес а кои ги објави локалната власт. Резултатите од Градска плажа 1, која од минатата година е уредена и има најмногу капачи во текот на летото, може да се користи за капење.

„Направени се хемиски и  микробиолошки тестирања на мостри земени од неколку места на езерото и според добиените резултати параметрите се во максимално дозволените граници. Резултатите од лабораториските анализи на мостри земени од водата на Градска плажа бр.1, покажуваат дека во однос на микробиолошките индикатори, водата е исправна, додека според физичко-хемиските параметри водата по матност е во 5-та, а по однос на другите параметри е во 2-ра и 1-ва класа“ - соопштија од локалната власт.

Река Бабуна, во нејзиниот долен тек  не е дозволена за капење.

„Анализите на Центарот за јавно здравје, направени на мостри земени на мерно место плажа 1, над кланица, покажуваат дека е бактериолошки неисправна и во неа се содржи бактеријата ешерихија коли. По матност водите на реката се во 5-та класа и во 3-та класа по бактериска контаминација“ - информираа од Општина Велес. 

Поради овие податоци,  водите на реката Бабуна во нејзиниот долен тек,  не може да се користат за капење и рекреација и за наводнување на земјоделски површини.Центарот за јавно здравје не зема повеќе мостри за квалитетот нa водата на река Тополка, во нејзиниот долен тек.