Петар Печков

Објавено: понеделник, 08 мај 2023 348 33

Денес на пладне во Ликовниот салон во Велес беше отворена ретроспективна  изложба на дела од академскиот сликар и скулптор,  Владимир Георгиевски  (1942-2017). На изложбата се дел од неговите дела, кои се сопственост на неговите потомци. На изложбата се поставени 20 дела изработени во различни техники.

„На изложбата се претставени дела, на кои се најчестите мотиви  со кој се бавеше мојот татко. Тоа се животот на човекот, човековиот пат составен од  страдања, неговата верба или недостаток на верба, убавините на природата од која што  тој најмногу учеше и неговиот коментар на општеството и времето во кое живееше“ - кажа Фросина Георгиевска, ќерка на авторот Владимир.
 
Има две различни поставки кои кружат низ државата, како патувачки изложби.  Досега беа претставени во Штип и Свети Николе, од денес се во Велес и Гевгелија, по што следат Кавадарци и Неготино, па други градови. Изложбата беше поставена на почетокот од годинава во Музеј на град Скопје и таа е патувачка .  

„Изложбата се работи во соработка на семејството на Владимир. Таа прави пресек на творештвото на професорот. Ги претставуваме помалите формати на слики на авторот за да може публиката да проследи извонреден избор од големото творештво на Георгиевски“ кажа Јасминка Намичева кустос во Музејот на Град Скопје.

Владимир Георгиевски создал и сценографски и костимографски решенија за преку 30 театарски претстави во Македонија и во земјите на поранешна Југославија.