Петар Печков

Објавено: четврток, 30 декември 2021 706 70

При крајот на конзерваториските активности во манастирската црква СВ. Димитрија крај Велес, откриени нови моменти, кои даваат повод за додатни истражувања. Ако претходните откритија, беа во просторијата под камбанаријата,   новите се лоцирани при сондажните истражувања  на долната зона од  јужниот ѕид од црквата.  

„Откривме нов живопис, многу интересен за науката и постоењето на црквата. Тој се наоѓа под тој од 19-ти век, или изработен е порано. Станува збор за живопис, кој не е дел од тој што го откривме дека е од 13-14 век, туку подоцна. Мали се сознанијата за него, кога настанал, но фрла нова светлина за црквата. Се гледа дека е работен со друга техника на работа, други пигменти од овие постојните“ - кажа Владо Муковски, советник конзерватор за ѕидно сликарство при  Националниот конзерваторски центар од Скопје

Конзерваториските работи на фреските од Страшниот суд,  траеја скоро еден месец, а ги изведуваа стручните лица од Националниот конзерватоски центар од Скопје. Дали ова ново откритие ќе фрли нови моменти за постоењето на црквата, одговор треба да се добие од истражувањата кои се очекува да продолжат и наредната година. 

Доколку се докаже дека новооткриените фрески се порано од 19-ти век а подоцна од 14-ти, тогаш и легендата, која велешани ја раскажуваат,  дека манастирот бил закопан пет века под земја, по доаѓањето на Османлиите, ќе падне во вода.