Петар Печков

Објавено: петок, 11 април 2025 474 6

Министерот за локална самоуправа, Златко Перински, во  посета на Општина Велес, каде што се сретна со градоначалникот Марко Колев, членовите на општинскиот Совет и вработени во локалната власт.

На средбата се  разговарало за тековните и идните проекти во општината, со акцент на инфраструктурниот развој, за текот на проектот од првиот владин повик за поддршка на инфраструктурни општински проекти, кои Општината  ги реализира самостојно, но и со поддршка од централната власт.

На Општина Велес на првиот владин повик  беше одобрен еден проект, партерно уредување на плоштад и изградба на подземна гаража во централното градско подрачје, а на вториот владин повик, кој трае до 30 април, Општината поднела  16 апликации.

„Владината инвестиција за уредување на плоштад и изградба на подземна гаража директно ќе придонесе за трансформација на урбаниот изглед на Велес, ќе овозможи нов јавен простор за жителите и ќе создаде поголеми можности за културни и социјални активности. Подземната гаража треба да  го реши долгогодишниот проблем со паркирањето во центарот на градот и ќе обезбеди поефикасен и побезбеден сообраќаен систем, што е од особена важност за урбаната мобилност и секојдневното функционирање на граѓаните“ - кажал градоначалникот Колев.

„Владата не отстапува од континуираната поддршката на општините, со јасна и единствена цел, создавање услови за поголем развој на секоја општина. Силна држава се гради врз темелите на развиени локални заедници“ -  порача министерот Перински.

Неговата посета  е дел од теренските активности со цел директно запознавање и идентификување на сите предизвици во единиците на локална самоуправа и планирање насоки на движење за нивно надминување.