Петар Печков

Објавено: петок, 27 јануари 2023 10415 20

Откриен идентитетот на петте млади лица, меѓу нив четворица велешани кои вршеле трговија со деца и снимале порнографски материјал cо дете девојче од Велес, кое имало 14 години.

МВР објави дека открила  случај за сторено кривично дело „трговија со дете“ предвидено и казниво по член 418-г од Кривичен законик, извршено од страна на пет лица на возраст од 25 до 32 години, од кои четири од Велес и едно од Тетово, кои се лишени од слобода.

„ С.Д.(25 год) од Велес во временскиот период од 09.12.2021 година и во текот на 2022 година вршел продолжени кривични дела трговија со дете, користејќи закани, принуда за користење дрога и алкохол, и со уцена дека јавно ќе објави експлицитен материјал, овозможил малолетничката да биде злоупотребена за сексуални услуги и изготвување на порнографски материјал. Тој им овозможил на Д.С.(32 год) од Тетово, Д.Н.(25 год), Т.И.(22 год) и К.Т.(24 год), сите од Велес, да користат сексуални услуги од малолетничката, а на Д.С. и да изготви порнографски материјал“- соопштија од МВР.
Врз основа на издадена судска наредба од Основен кривичен суд Велес, на подрачјето на Велес извршен е претрес во дом и други простории кај С.Д., петте лица се приведени и против нив од Одделот за сузбивање на организиран и сериозен криминал е поднесена кривична пријава до Основното јавно обвинителство за гонење на организиран криминал и корупција за сторено кривично дело „трговија со дете“ по чл 418-г од Кривичниот законик.

Јавен обвинител од Основното јавно обвинителство за гонење на организиран криминал и корупција, постапувајќи по кривичната пријава на Националната единица за сузбивање криумчарење мигранти и трговија со луѓе при МВР, во текот на вчерашниот ден донесе Наредба за спроведување на истражна постапка против четири лица од Велес  С.Д.(25 год) Д.Н.(25 год), Т.И.(22 год) и К.Т.(24 год) и едно лице од Тетово Д.С.(32 год). Врз основа на прибраните докази постои основано сомнение дека осомничените сториле кривично дело Трговија со дете предвидено и казниво по член 418-г од Кривичниот законик.

„Првоосомничениот,С.Д. дваесет и петгодишен велешанец, од крајот на декември 2021 година и во текот на 2022 година, со употреба на закана над детето – жртва им овозможил на останатите осомничени и на други НН лица да вршат полови дејствија со жртвата на трговија со луѓе – по пат на сексуални активности, сексуална експлоатација и порнографија. Тој, во декември 2021 година преку апликацијата Instagram остварил комуникација со четиринаесетгодишното девојче – жртва на трговија со луѓе и по неколку неделна континуирана комуникација преку апликацијата, откако стекнал доверба кај жртвата, ја довел во заблуда дека ќе започнат љубовна врска. На првата средба бил направен порнографски материјал што првоосомничениот го користел како закана за да го присили девојчето да доаѓа и на други средби, заканувајќи се дека доколку не дојде, материјалите со интимна содржина ќе ги објави и ќе ги сподели на социјалните мрежи, со што ќе и наштети на нејзината чест и углед.

На овој начин, првоосомничениот го принудувал детето – жртва во повеќе наврати да оди во станови што биле наменски изнајмувани на повеќе локации во Велес. На средбите присуствувале осомничени и други НН машки лица, кои прво конзумирале наркотична дрога и алкохолни пијалоци, па во таква состојба вршеле полови дејствија врз детето – жртва и користеле сексуални услуги иако знаеле и биле должни да знаат дека малолетното дете е жртва на трговија со луѓе“ - соопштија од обвинителството за гонење организиран криминал  .

Ценејќи дека постојат околности што го оправдуваат стравот oд опасност од бегство, дека ќе ги сокријат, фалсификуваат или уништат трагите на кривичното дело и дека со влијание врз сведоци и соучесници ќе ја попречат истрагата, како и стравот ако се бранат од слобода дека ќе го повторат делото, на предлог на јавниот обвинител судијата на претходна постапка со решение определи мерка притвор за четворица осомничени и мерка куќен притвор за еден од осомничените.

За ова кривично дело предвидена е казна затвор од најмалку осум години.