Петар Печков

Објавено: четврток, 26 декември 2024 505 6

На свечена седница традиционално на крајот од годината, локалната власт ги наградува најуспешните  за годината што изминува, за 2024. Но и се испорачува честитката за Новата 2025 година. Годинава ја кажа заменикот градоначалник Коста Нојков.

„На прагот сме на крајот од уште една година, исполнета со работни задачи, проекти, предизвици со кои се обидовме да го подобриме квалиетот на  животот на граѓаните на Велес. Исполивме речиси 100 отсто од предвидените планирани проекти. Со исто темпо на работа и развој ќе продолжиме и следната година, се во интерес на граѓаните“ – кажа Нојков.

Тој од името на градоначалникот Колев, советниците на жителите на Општина Велес им ја честиташе новата 2025 година.

„Посакувам да бидете истрајни во исполнувањето на своите животни цели,  успешно да ги надминувате сите препреки во животот,  да градите мост на заемна почит и разбирање“ – порача Нојков.

Годинва признанија добија Никола Цековски хуманист на Велес со најмногу крводарувања,   Борче Пачуков, најуспешен пожарникар, Трајче Деловски, најуспешен полициски службеник  и Пане Костовски, најуспешен комунален работник. 

Никола Цветковски како активен дарител има најмногу дарувања на крв, 1982-та  е годината кога Никола како припадник на Армијата стациониран во Сомбор за прв пат ја подава раката за дарување на драгоцената течност. И така се до денес, непрекинато,цели 42 години, несебично и редовно дарува живот. Во изминатите повеќе од четири децении тој дарувал на повеќето акции кои го организира Црвениот крст на Република Македонија Општинска организација Велес, но најмногу самоиницијативно во Одделението за трансфузиона медицина во Велес. Пред само  два месеци, во октомври годинава, тој дарувал крв по 129 пат. И со тоа, од активните крводарители е крводарителот со најмногу дарувања на територија на Општина Велес.

Најуспешниот работник од областа на безбедноста-професионален пожарникар за 2024 година е Борче Пачуков вработен како Пожарникар- спасител во Територијалната противпожарна единица Велес. Наградата е  во смелите раце на Борче, кој  професионално и посветено учествува во сите активности и акции што се организираат за безбедност на граѓаните. При спроведување на акциите приоритети му се спасувањето животи на граѓаните и нивните матријалните добра, на сметка на ризикот по сопствениот живот. Пачуков е подеднакво тимски соработник на обука и при интервенција. Одговорен, дисциплиниран, посветен и професионален.

Во категоријата најуспешни, Општина Велес наградува и полициски службеник, кој со својата професионалност се истакнува пред останатите. Годинава тоа е Трајче Деловски.  Во МВР вработен е во редовен работен однос од 2017 година. Полициската Станица од Општа Надлежност Велес, дежурниот полицаец Деловски го оквалификува како еден од најпрофесионалните и најодговорните во извршување на задачите во службата. Во своето професионално работење се истакнува со темелно познавање на законската регулатива, со одговорност и дисциплина, како и посветеност во градењето на меѓучовечките односи во колективот. Тој е позитивен пример за односот кон колегите и странките. Во своето досегашно работење извршувал и работни задачи во во Одделот за недозволена трговија со дрога и оружје, каде уште еднаш со резултати се потврдил во делот на оперативното работење.

За најуспешен комунален работник за 2024 година се наградува лицето Пане Костовски вработен во ЈКП Дервен на работно место ракувач со земјоделски машини. Тој  работи во Секторот Паркови и зеленило при ЈКП Дервен од  2012 година на работно место Ракувач со земјоделски машини, а истовремено е и возач е на специјалното возило - дигалка со корпа. Во текот на цел овој период, тој покажува високо ниво на стручност, вложување и мотивираност во извршувањето на своите работни задачи. Костовски изнаоѓа најповолни решенија во проблематични ситуации, одржува позитивен однос со своите колеги и позитивно влијае на работниот тим. Го одликува висок степен на одговорност и внимателност. Негови одлики се скромноста и подготвеноста да сработи повеќе отколку се бара. Работи професионално, посветено и со многу љубов. 

На свеченоста  беа доделени и стипедниите за ученици и студенти.