Петар Печков

Објавено: понеделник, 03 февруари 2020 574 195

В четврток, 6-ти февруари во 20 часот, на малата сцена велешкиот театар „Јордан Хаџи Константинов- Џинот“,премиерно ќе ја изведе претставата „Сара“ од Катерина Момева, во режија на Елеонора Теова.

„Сара“ е праизведба на истоимениот драмски текст на Катерина Момева и втора премиера на Велешкиот театар за сезона 2020, две седмици по премиерата на ,,Сестрите Прозорови,,  и двете  театарот ги реализира од сопствени средства. Улогите во претставата ги толкуваат Васил Зафирчев, Кети Борисовска, Симона Димковска, Кристина Нацева, Самоил Стојановски и Славица Манаскова. 

Сара е драма за невротичната потреба за љубов, хистеричната потреба за внимание, растроената потреба да се сочува илузијата на секојдневието. Драма за човечкото и животинското во нас, за нагонот кој што сака самиот себе да се изрази, но и размисла за последиците од тоа – вели режисерката Елеонора Теова.

Подобро да не навлегуваш во мрачните страни на човек затоа што не знаеш што ќе најдеш таму. А што би нашол? И можеби тој мрак од кој толку се плашиме сака да биде пополнет со љубов –кажа  авторката на драмата Катерина Момева.

Сценограф на претставата и автор на рекламниот материјал е Филип Коруновски, а изборот на музиката е на Орхидеја Дукова. Оваа претстава в.д директорот Ивановски ја најави дека премиерно ќе биде изведена на почетокот на декември, но бидејќи објектот немаше греење, премиерата се одложи два месеци подоцна.